- Atzo ospatutako Espainiako Ardoaren Ibilbideen Kudeaketa Batzordean Aiaraldeako Txakolinaren Ibilbidearen Elkartea ibilbidearen erakunde kudeatzaile berri gisa aurkeztu zen
- Aiaraldeak ACEVINen parte izaten jarraituko du eta Estatuko Ardo Hirien sareko kide izaten segituko du
Aiaraldeko Kuadrillak astelehen honetan Espainiako Ardoaren Ibilbideen Kudeaketa Batzordearen bileran parte hartu du. Bertan, Aiaraldeko Txakolinaren Ibilbidearen ziurtagiria 2028. urtera arte berritzea onartu da, eta horrela, estatu mailako enoturismoaren panoraman kalitatezko helmuga gisa duen kokapena sendotu da.
Topaketa berean, Aiaraldeko Txakolinaren Ibilbidearen Elkartea ibilbidearen erakunde kudeatzaile berri gisa aurkeztu da. Urrats garrantzitsua da proiektuaren gobernantza indartzeko, haren garapena optimizatzeko eta Aiaraldearen sustapenean aurrera egiten jarraitzeko.
Aiaraldeko Kuadrillako presidente Iñigo Pinedok aitortza honen garrantzia azpimarratu du: “Ziurtagiriaren berritzeak urte hauetan egindako lanari eta inplikatutako eragile guztien konpromisoari babesa ematen dio. Kalitatearen bermea da eta hobetzen jarraitzeko motibazioa ere bai”. Pinedok eskerrak eman nahi izan ditu eta honakoa nabarmendu du: “Lorpen hau upeltegien, tokiko erakundeen, turismo arloko profesionalen eta gure eskualdearen potentzialean sinesten duten pertsona guztien inplikazioari esker posible da”.
Halaber, Kuadrillak gaur ACEVINen (Espainiako Hiri Mahastizain Txiki eta Ertainen Elkartea) XXXIII. Batzar Nagusian parte hartu du. Bertan, Estatuko sarearen barruan Ardo Hiri gisa duen konpromisoa berretsi du, eta izaera hori mantentzen jarraituko du.
Foro honetan Aiaraldeak duen presentziari esker, eskualdeak esperientziak partekatu, beste helmuga batzuekin sinergiak sortu eta bere enoturismo eskaintza hobetzen jarraitzeko aukera du.
Aurrerapauso hauekin, Aiaraldeko Kuadrillak Txakolinaren Ibilbidea sendotzen jarraitzen du bere garapen turistikorako ardatz nagusietako bat bezala, eskualdearen potentziala eta mahastizaintza tradizioa estatu osora proiektatuz.
